Gibarugan ni Senator-Judge Panfilo Lacson nga dili niya suportahan ang pag-abli sa kahon sa Bureau of Internal Revenue (BIR) nga naglangkob sa mga tax records ni Vice President Sara Duterte ug sa iyang bana nga si Atty. Manases Carpio, kon walay sinulat nga pagtugot gikan sa Pangulo nga gikinahanglan ubos sa balaod.
Sumala pa kang Lacson, dili siya mahimong mouyon sa bisan unsang lakang nga posibleng mosupak sa mga probisyon sa balaod, bisan pa kon kabahin kini sa nagpadayon nga impeachment trial. Gipasiugda sa senador nga ang maong dokumento dili mahimong ablihan kon wala matuman ang legal nga mga rekisitos, lakip na ang gikinahanglang written authority gikan sa Presidente.
Dugang pa niini, gitumbok ni Lacson ang Sections 71 ug 270 sa National Internal Revenue Code, ingon man ang mga naunang desisyon sa Korte Suprema, isip legal nga basehan sa iyang baruganan. Matod pa sa senator-judge, walay bisan kinsa nga labaw sa balaod, lakip na ang impeachment court nga karon nagdumala sa husay batok kang Vice President Sara Duterte.
Giklaro usab ni Lacson nga ang iyang posisyon dili pagpanig sa depensa, kondili usa lamang ka pagpatuman sa balaod ug pagrespeto sa due process nga angay sundon sa tanang partido.Sa pagkakaron, padayon ang impeachment trial sa Senado, samtang nagpadayon usab ang diskusyon sa mga senator-judges kabahin sa legalidad ug pagdawat sa mga ebidensiyang ipresentar sa duha ka panig.
