Gikasuhan sa Office of the Ombudsman si kanhi Overseas Workers Welfare Administration (OWWA) Administrator Arnell Ignacio og Usurpation of Official Functions may kalabotan sa kontrobersyal nga P1.4 bilyong pisong pagpalit og propiedad sa ahensya.
Sumala kang Department of Migrant Workers (DMW) Secretary Hans Leo Cacdac, nadawat sa ilang opisina niadtong Hulyo 7, 2026 ang resolusyon sa Ombudsman nga gipetsahan og Hunyo 19, 2026.
Base sa resolusyon, giingong gipirmahan ni Ignacio ang contract to sell, deed of absolute sale, ug ang may kalabutan nga addendum sa transaksyon.
Giingon usab nga giaprobahan niini ang pagpagawas sa pondo sa gobyerno bisan wala kuno’y pagtugot gikan sa OWWA Board of Trustees.
Matod ni Cacdac, ang nakit-an sa Ombudsman mao ang pagpasaka og kaso batok kang Ignacio tungod sa pag-angkon og opisyal nga katungdanan ubos sa Article 177 sa Revised Penal Code.
Sumala pa sa Ombudsman, milihok si Ignacio nga daw adunay siyay awtoridad gikan sa OWWA Board bisan nahibaloan niya nga wala siya’y maong gahum.
Gipasabot sa ahensya nga ang maong aksyon dili lamang usa ka yano nga kakulang sa proseso, kondili usa ka paglapas nga mahimong mosangpot sa kaso sa Usurpation of Official Functions.
Matod ni Cacdac, mahimong silotan og pagkabilanggo gikan unom ka bulan hangtod upat ka tuig ang maong kaso, depende sa desisyon sa korte.
Gimandoan na usab sa Ombudsman ang pagsumite sa angay nga impormasyon batok kang Ignacio.
Samtang, gilabay sa Ombudsman ang mga reklamo nga may kalabotan sa Anti-Graft and Corrupt Practices Act, malversation of public funds, ug plunder batok sa pipila ka kanhing opisyal sa OWWA ug mga pribadong indibidwal nga nalambigit sa pagbaligya sa yuta.
Gipahayag ni Cacdac nga magsumite ang DMW og Motion for Reconsideration aron hangyoon ang Ombudsman nga usbon ang pagtan-aw sa maong mga reklamo.
