Naglaum si Impeachment Court Presiding Officer ug Senate President Francis Escudero nga masulbad dayon sa Korte Suprema ang isyu kabahin sa gidaghanon sa boto nga gikinahanglan aron mahatagan og silot o mahukman ang usa ka gipasakaan og impeachment samtang wala pa magpagawas og pinal nga desisyon ang Senado sa kasamtangang kaso ni Vice President Sara Duterte.
Matud ni Escudero, nagpabilin nga basihan sa impeachment court ang 16 ka boto o two-thirds sa kinatibuk-ang 24 ka miyembro sa Senado, subay sa Konstitusyon ug sa kasamtangang desisyon sa Korte Suprema sa kasong Bayan v. Zamora.
Gipasabot niini nga bisan pa og 21 na lamang ang aktibong senador tungod kay naa sa prisohan sila Senators Jinggoy Estrada ug Rodante Marcoleta, samtang wala pa makita si Senator Ronald Bato dela Rosa, ang basihan gihapon sa two-thirds vote mao ang kinatibuk-ang 24 ka pwesto sa Senado.
Gipasiugda usab ni Escudero nga wala kini nakakuha og kasabutan gikan sa ubang senador kabahin sa maong isyu, kondili iyang gipadayag lamang ang iyang legal nga pagsabot base sa kasamtangang balaod.
Matud pa, mas maayo nga masulbad na sa Korte Suprema ang maong isyu kung adunay mosang-at og petisyon samtang nagpadayon pa ang pagdungog sa kaso sa impeachment aron malikayan ang bag-ong panaglalis human makapagawas og desisyon ang impeachment court.
Dugang ni Escudero, ang tumong sa proseso sa impeachment mao ang paghuman sa mga isyu nga giatubang sa nasod ug dili ang pag-abli og bag-ong ligal nga panagbangi human sa pagdungog ug paghukom sa kaso.
