Misaka sa kinatibuk-ang 789 ka mga pasahero ug biyahero ang gidaghanon sa mga na-stranded sa 58 ka pantalan sa nagkalain-laing bahin sa nasud human kanselahon ang mga biyahe sa dagat tungod sa epekto sa bagyong Inday.
Sumala sa pinakabag-ong Maritime Safety Advisory nga gipagawas sa Philippine Coast Guard (PCG) karong Biyernes, Hulyo 10, lakip sa mga na-stranded ang mga pasahero, truck drivers, cargo helpers, ingon man 249 ka rolling cargoes, 13 ka barko ug 33 ka motorbanca.
Dugang pa niini, mipadayag ang PCG nga 158 ka barko ug 145 ka motorbanca ang sa pagkakaron temporaryong nagpabilin sa luwas nga mga dapit aron makalikay sa kusog nga hangin ug balod nga dala sa bagyo.
Lakip sa mga rehiyon nga adunay mga na-stranded nga pasahero ang Southern Tagalog, Northwestern Luzon, Southern Visayas, Western Visayas, Central Visayas, Bicol Region, Bangsamoro Autonomous Region in Muslim Mindanao (BARMM), Palawan, Northeastern Luzon ug Northwestern Visayas.
Kahinumduman nga padayon nga gipatuman sa Philippine Coast Guard ang no-sail policy sa mga lugar nga apektado sa bagyo aron masiguro ang kaluwasan sa mga pasahero, tripulante ug mga sakyanang pangdagat.
Sa kasamtangan, nagpadayon ang pagmonitor sa PCG sa kahimtang sa mga pantalan ug mga rutang pandagat, samtang gihangyo ang mga pasahero nga maghulat sa sunod nga advisory sa dili pa mopadayon sa ilang mga biyahe.
