Nagpabuto ang Iran og napulo ka ballistic missiles padulong sa Azraq military base sa Jordan kaniadtong Huwebes, Hulyo 9, 2026 sumala sa pahayag sa Iran’s Revolutionary Guards nga gipasa pinaagi sa state media.Gipahayag sa Jordan nga ilang napugngan ang walo ka missiles nga gilusad gikan sa Iran, ug wala’y natalang kaswalti o kadaot.
Gipasidaan sa Revolutionary Guards nga targeton nila ang mga military base sa Estados Unidos sa rehiyon kung mausab pa ang giingong “U.S. aggression.”
Samtang sa laing bahin, mikunhod pag-ayo ang gidaghanon sa mga barko nga moagi sa Strait of Hormuz tungod sa nagkagrabeng nga tensyon sa rehiyon.
Kasagarang adunay mga 130 ka barko nga naga-agi kada adlaw sa maong ruta sa wala pa misamot ang panagbangi, apan karun nahulog na lamang sa usa ka digit ang gidaghanon sa mga barkong nagalayag sa maong strait.
Nahisgotan nga nahitabo kini human sa bag-ong baylo-anay og airstrike tali sa Estados Unidos ug Iran kaniadtong Hulyo 8-9, 2026.
Gipahibalo sa US military nga ilang target sa airstrike ang kapin 90 ka military base sa Iran, lakip ang pipila ka pasilidad duol sa Strait of Hormuz, aron pahinayon ang abilidad sa Iran sa pag-atake sa mga komersyal nga barko ug sibilyan nga moagi sa maong ruta.
Isip balos, miatake usab ang Islamic Revolutionary Guard Corps (IRGC) sa mga militray base sa US ug Bahrain, nga ilang gitawag nga sinugdanan pa lamang sa ilang “punitive response.”
Adunay posibilidad usab nga maglusad og bag-ong missile attacks ang IRGC batok Kuwait ug Iraq diin nahimutang ang mga military base sa Estados Unidos.
Gipahibalo sa Iranian Ministry of Health nga gawas sa 14 nga namatay, mokabat sa 78 ka tawo ang gikatahong nasamdan sa pagpamomba sa US, samtang adunay mga dapit duol sa Bushehr nuclear power plant nga naigo usab.
Nagkanayon si U.S. President Donald Trump nga gusto kuno sa Iran nga makig-negosasyon pag-usab sa Estados Unidos, apan nagduhaduha siya niini. Apan, gilimod kini ni Iranian Foreign Minister Abbas Araghchi nga pahayag ug miingon nga tubagon sa Iran ang mga aksyon sa Estados Unidos dili pinaagi sa mga pulong, kondili pinaagi sa mas grabeng counter-attack. Wala na’y daghang istorya, tumanon gayud nila ang moang opensiba.
