Gipahayag sa Bangko Sentral ng Pilipinas (BSP) ang pagsuporta niini sa desisyon sa pipila ka mga bangko nga mopaubos o motangtang sa bayronon sa interbank digital transactions.
Gitumong sa maong lakang nga himuong mas barato ug mas sayon alang sa mga Pilipino ang paggamit sa electronic fund transfers.
Gipatuman ang maong desisyon isip tubag sa BSP Circular No. 1238, nga nagmando sa mga bangko nga mopaubos sa transfer fees kutob sa mahimo ug mag-andam sa pagsumite og cost analysis kung gikinahanglan.
Matod ni BSP Governor Eli M. Remolona Jr., ang mas ubos nga transaction costs makatabang sa mas paspas nga pagdaghan sa paggamit sa digital payments ug sa pagpalig-on sa payment system sa nasud.
Gilauman nga ang pagkunhod sa transfer fees mosuporta sa padayon nga pagtubo sa digital economy sa Pilipinas.
Mipadayon ang BSP sa pakigtambayayong sa banking industry ug uban pang stakeholders aron mapalambo ang usa ka barato, kasaligan, ug mas accessible nga digital payments ecosystem alang sa mga konsumidor, negosyo, ug ekonomiya.
