Subling gihisgutan sa social media ang pagpasabot sa Korte Suprema kabahin sa paggamit og photocopy sa mga dokumento isip ebidensiya sa korte.
Nahitabo kini human gikuwestiyon ni defense counsel Atty. Carlo Narvasa ang pipila ka mga dokumentong gipresentar sa prosecution sa impeachment trial ni Vice President Sara Duterte tungod kay mga photocopy lamang kuno kini.
Gipaambit pag-usab sa mga netizen ang pahayag nga gipagawas sa Korte Suprema kaniadtong Mayo 9, 2025 nga nag-ingon nga mahimong dawaton isip ebidensiya ang duplicate o photocopy sa orihinal nga dokumento basta walay pagduhaduha sa pagka-authentic sa orihinal ug dili kini mahimong dili patas sa paggamit sa kopya.
Gibase kini sa desisyon sa Supreme Court sa kasong People of the Philippines versus Ybo Lastimosa, diin gitugotan sa hukuman ang paggamit sa photocopy sa death certificate isip kabahin sa mga ebidensiya.
Giklaro usa nga bisan mahimong dawaton ang photocopy isip ebidensiya, ang gibug-aton o bili niini magdepende gihapon sa ubang ebidensiyang mosuporta niini.
Gipamatud-an usab sa Korte Suprema ang silot nga reclusion perpetua batok kang Ybo Lastimosa human mapamatud-ang nakasala kini sa pagpatay.
