Gilauman nga mausab ang presyo sa mga produktong petrolyo sugod karong adlawa,Hulyo 7, sumala sa Department of Energy (DOE). Sumala pa sa DOE, posible nga magkalain-lain ang ipatuman nga price adjustment sa matag kompanya sa lana. Gibanabana nga ang gasolina mahimong mokunhod og hangtod P1.75 o mosaka og P0.25 matag litro, samtang ang diesel mahimong mosaka tali sa P1.57 hangtod P3.57 matag litro. Ang kerosene usab gilauman nga mosaka og P1.70 hangtod P3.70 matag litro.
Dugang pa niini, ikaduha na kini nga sunod-sunod nga pagsaka sa presyo sa gasolina ug diesel, nga nagpakita sa padayon nga pagsaka sa presyo sa mga produktong petrolyo sa nasod niining tuiga.
Lakip sa gipahibalo ni Energy Secretary Sharon Garin ang plano sa pag-amendar sa Oil Deregulation Law, lakip ang pagtukod og government fuel reserve nga igo alang sa 60 ka adlaw nga suplay ug ang pagpalugway sa inventory requirement sa mga oil company gikan sa 15 ngadto sa 30 ka adlaw.
Sa kasamtangan, gipadayag sa DOE nga igo gihapon ang suplay sa gasolina ug diesel sa nasod, samtang mas taas pa ang imbentaryo sa kerosene ug jet fuel. Giingon usab sa ahensya nga bisan mikunhod na ang presyo sa krudo sa internasyonal nga merkado, wala pa kini hingpit nga mabati sa presyo sa lana sa lokal nga merkado.
Kahinumduman, gipatuman sa mga kompanya sa lana ang bag-ong price adjustment sugod alas-6:00 sa buntag karong Hulyo 7.
