Nakumpirma sa Mandaluyong City Epidemiology and Surveillance Unit ang unang kaso sa mpox o monkeypox sa siyudad.
Sumala sa advisory sa lokal nga panggamhanan, gilunsad na ang case investigation, contact tracing, risk assessment ug pagmonitor sa mga close contacts sa pasyente sa pakigtambayayong sa lokal ug regional health offices. Wala pa hinuoy gipadayag sa siyudad kung giunsa o asa nagsugod ang maong kaso.
Ang mpox usa ka makatakod nga sakit nga mahimong mapasa pinaagi sa duol nga pakigkontak sa usa ka natakdan o sa mga butang nga iyang nahikapan. Mahimo usab kining mapasa gikan sa hayop ngadto sa tawo.
Lakip sa mga sintomas niini ang hilanat, sakit sa ulo, sakit sa likod ug kaunoran, ug grabeng kakapoy. Matud sa World Health Organization (WHO), talagsaon lamang ang mga kaso sa pagkamatay tungod sa mpox.
