Madayon ang pormal nga pagtaral sa impeachment court batok kang Vice President Sara Duterte karung umalabot nga Hulyo 6, 2026 taliwala sa isyu nga adunay kalabotan sa usa ka selyadong kahon sa mga dokumento gikan sa Bureau of Internal Revenue.
Matud pa ni Senate Secretary ug impeachment court clerk Atty. Renato Bantug Jr., walay rason nga maapektuhan sa maong isyu ang gitakdang pagsugod sa pagtaral.
Ang selyadong kahon naglangkob sa mga income tax return sa Bise Presidente, lakip na sa iyang bana nga si Atty. Manases Carpio.
Migawas ang isyu human gihangyo sa House prosecution panel atol sa pre-trial conference nga ablihan ug markahan ang kahon isip kabahin sa ilang mga ebidensiya.
Samtang, gikatakdang ipagawas sa Hunyo 29, 2026 ang pre-trial order sa impeachment court. Naglangkob kini sa mga nasabotan sa prosekusyon ug depensa, lakip ang mga kamatuoran nga wala nay gilalisan, listahan sa mga testigo, ug iskedyul sa pagtaral.
Aduna usab tulo ka adlaw ang duha ka panig, o hangtod Hulyo 2, 2026 aron isumite ang ilang mga komento sa maong pre-trial order.
