Gipahibalo ni Mamamayang Liberal Partylist Rep. Leila De Lima nga labaw sa 50% sa mga ebidensya sa impeachment case batok kang Vice President Sara Duterte ang namarkahan na sa pre-trial proceedings sa Senado.Matud pa ni De Lima nga padayon ang proseso ug wala gilauman nga malangan ang nakatakdang pagsugod sa impeachment trial sa Hulyo 6, 2026.
Gidugangan sa Senado ang marking teams gikan sa upat ngadto sa unom ug gipalawig ang oras sa trabaho gikan alas-9 sa buntag hangtod alas-7 sa gabii aron mapaspasan ang pagproseso sa mga dokumento.
Gipadayag usab ni De Lima nga posible nga mahuman sa sunod nga adlaw ang pagmarka sa Article 2 sa reklamo nga adunay kalabotan sa giingong unexplained wealth, tungod kay mas gamay ang mga dokumento niini kung itandi sa Article 1 nga adunay gikalimbigatan sa confidential funds. Mas bug-at matud pa gihapon ang trabaho sa mga dokumento sa confidential funds, lakip na ang mga acknowledgment receipts nga usa sa mga nag-unang ebidensya sa kaso.
Mipasaka usab ang House prosecutors og hangyo ngadto sa Senate Impeachment Court alang sa upat ka dugang nga pre-trial measures aron masiguro ang hapsay, klaro ug episyenteng pagdumala sa impeachment trial sa Bise Presidente.
Gisugyot sa prosekusyon ang paggamit sa Filipino ug English sa mga pagdungog, sayong pagpahibalo sa mga testigo, pagtugot sa publiko ug pribadong prosecutors sa pagsusi sa mga testigo, ug pag-abli sa nakaselyong kahon sa mga rekord gikan sa Bureau of Internal Revenue (BIR) nga anaa sa kustodiya sa korte.Mituo ang prosekusyon nga makatabang kining mga lakang aron mapadali ang pagtaral, malikayan ang mga procedural dispute, ug mapabiling nakapokus ang proseso sa presentasyon sa mga ebidensya ug testimonya.
