Napahimutang na sa temporaryong kapuy-an ang ubay-ubay nga mga pamilyang naapektuhan sa Magnitude 7.8 nga linog sa Brgy. Nuing, Jose Abad Santos, Davao Occidental human maplastar ang mga Family Tents gikan sa Department of Social Welfare and Development (DSWD) Field Office XI.
Ang mga evacuees naglangkob sa mga residente gikan sa nagkalain-laing sitios ug kasikbit nga mga barangay nga naapektuhan sa kusog nga linog, sunod-sunod nga aftershocks ug sa nahimong artificial damming tungod sa mga landslide nga nakababag sa dagan sa tubig sa kabukiran.
Sumala sa DSWD, gilauman nga mokabat sa dul-an 50 ka Family Tents ang matukod sa evacuation site nga nahimutang sa Ignacia Guillermo Central Elementary School aron madugangan pa ang mga pamilyang masilongan ug mapanalipdan gikan sa posibleng mga peligro. Sa kasamtangan, nagpadayon ang paghatod sa nagkalain-laing tabang ug serbisyo ngadto sa mga apektadong pamilya samtang nagpadayon usab ang relief ug recovery operations sa lugar.
