Nagpagawas og bag-ong mga sumbanan ang Registry sa International Criminal Court (ICC) alang sa umaabot nga pagtaral kang kanhing Presidente Rodrigo Duterte nga nag-atubang og kaso sa crimes against humanity kalabot sa iyang kampanya batok sa ilegal nga droga.
Lakip sa mga rekomendasyon sa ICC Registry ang pag-obligar sa tanang partido ug mga partisipante sa kaso nga klarong ilhon ang mga bahin sa transcript nga ilang gustong ipa-redact o itago gikan sa publiko.
Girekomenda usab sa Registry ang paggamit sa transcript verification process nga gigamit kaniadto sa kaso ni Mahamat Said Abdel Kani aron maseguro ang katukma sa opisyal nga rekord sa mga pagdungog sa korte.
Dugang pa, gihagit sa Registry ang Trial Chamber III ug ang tanang partisipante sa kaso nga gamiton ang witness-entity ug evidentiary materials o E-binders modules sa Judicial Workflow Platform aron mapadayon ang organisado ug komprehensibong pagdumala sa tanang rekord sa kaso.
Kahinumdoman nga sa unang status conference niadtong Mayo 27, mipahibalo si Joanna Korner, Presiding Judge sa Trial Chamber III, nga ipahigayon sa korte ang laing medikal nga ebalwasyon sa kahimtang sa panglawas ni Duterte aron masuta kon andam ba kini nga moatubang sa pagtaral.
Gikatakdang magsugod ang trial ni Duterte sa Nobyembre 30, 2026. Aduny duha usab ka dugang nga status conferences nga pagahimoon sa Hunyo 23 ug Hulyo 14 isip kabahin sa pagpangandam sa maong pagtaral.
