Giaprobahan sa ika-21 nga Davao City Council sa ikatulo ug katapusang pagbasa ang Supplemental Budget No. 1 nga nagkantidad og kapin P1.25 bilyon.
Ang maong ordinansa naggahin og P1.253 bilyon alang sa General Fund Proper, Development Fund ug Economic Enterprises.
Sa maong kantidad, P891.66 milyon ang alang sa General Fund Proper, P333.25 milyon alang sa Development Fund ug P15.65 milyon alang sa Economic Enterprises.
Sumala ni Konsehal Danilo Dayanghirang, ipadala una ang budget ngadto sa mayor alang sa pinal nga pag-apruba sa dili pa kini ipatuman.
Gibutyag usab niya nga mokabat sa P200 milyon ang gigahin alang sa pagpalit og dugang nga mga bus ug sa digitalization component sa public transport system sa dakbayan.
Gikumpirma sa City Government nga magpalit kini og 20 ka dugang electric buses nga mopadako sa DC Bus fleet gikan sa 10 ngadto sa 30 ka unit.
Lakip usab sa budget ang P34 milyon alang sa landslide mitigation ug structural works sa sanitary landfill sa Barangay New Carmen, Tugbok District.
