Targeton sa House Prosecution Panel ang pag-abli sa mga bank account ni VP Sara Duterte sa higayon nga pormal nang magsugod ang impeachment trial sa Senate of the Philippines.
Sumala ni House Lead Prosecutor ug Batangas 2nd District Representative Gerville Luistro, lakip sa mga ebidensyang ilang ipresentar sa Senate trial nga wala pa napakita sa mga clarificatory hearing sa Kamara mao ang mga dokumento gikan sa mga bangko ug testimonya sa mga opisyal niini.
Matod pa ni Luistro, maampingon ug konserbatibo ang ilang mga lakang sa sinugdanan tungod sa hugot nga confidentiality nga gilatid sa Bank Secrecy Law. Apan, iyang gipadayag nga adunay exemptions ang maong balaod diin gitugotan ang pag-abli sa bank records, ilabi na sa mga kaso nga adunay kalabotan sa impeachment.
Dugang pa niini, lakip sa mga exemptions ang nakasulat nga pagtugot sa depositor, mando sa korte sa mga kaso sa bribery o dereliction of duty sa mga opisyal sa gobyerno, ug kon ang kuwarta nga gi-deposito mao mismo ang sentro sa reklamo o demanda.
Sa kasamtangan, gipadayag ni Luistro nga magpasaka sila og mosyon sa impeachment court aron magpagawas og subpoena batok sa mga opisyal sa bangko ug aron mapasumite ang mga dokumentong ilang gikinahanglan isip kabahin sa proseso sa paghusay. Positibo usab ang komite nga pagatubagon sa Senado ang ilang hangyo.
Lakip usab sa gilauman sa prosecution panel ang paglikay sa taas nga debate kalabot sa pag-abli sa maong bank accounts tungod kay gamiton kini isip opisyal nga ebidensya sa impeachment trial. Matod pa sa pinuno sa House Committee on Justice, klaro ang legal nga basehan sa maong lakang subay sa exemptions nga gitugotan sa balaod.
Sa pagkakaron, mibalibad una sa paghatag og komento ang defense team ni VP Sara mahitungod sa maong isyu samtang wala pa magsugod ang pormal nga pagdungog sa kaso sa Senado.
