Magpahigayon og imbestigasyon ang Commission on Human Rights (CHR) sa nahitabong madugong engkwentro sa militar ug mga gituohang myembro sa New People’s Army (NPA) sa Toboso, Negros Occidental nga miresulta sa kamatayon sa daghang indibidwal, lakip ang mga giingong miyembro sa armadong grupo ug mga sibilyan.
Sumala sa CHR, ilang gitutokan ang tinuod nga nahitabo sa insidente ug gi-validate ang mga pahayag gikan sa lain-laing sektor, tungod kay adunay nagkakontrang impormasyon mahitungod sa pagkatawo sa mga namatay.
Matod pa sa komisyon, importante nga matino kung naay nalapas nga human rights ug kung nasunod ba ang International Humanitarian Law sa maong operasyon. Padayon usab ang koordinasyon niini sa mga pamilya sa mga biktima ug sa mga otoridad aron makuha ang kompleto nga detalye sa insidente.
Gipasalig sa CHR nga ilang ipadayon ang independent investigation aron masiguro nga ang kamatuoran sa maong engkwentro mahibaw-an ug mahatagan og hustisya ang mga apektado.
