Giduso sa administrasyon ni US President Donald Trump ang pagdugang sa firing squad, electrocution, ug gas asphyxiation isip alternatibong paagi sa execution sa federal level, sumala sa report sa Justice Department.
Sumala sa report, tumong niini nga masulbad ang kakulang sa lethal injection drugs ug masiguro nga mapatuman ang silot kamatayon bisan adunay limitasyon sa supply.
Kabahin kini sa lakang ni Trump nga ibalik ang federal executions human tangtangon ang moratorium sa miaging administrasyon.
Sa pagkakaron, kapin sa 40 ka kaso ang ginaduso alang sa death penalty, bisan pa man wala pay nakaabot sa aktwal nga execution.
Tulo na lang ang nahibilin sa federal death row human gi-commute sa miaging administrasyon ang kadaghanan sa mga sentensya.
Nakakuha kini og batikos gikan sa human rights groups ug pipila ka magbabalaod, nga miingon nga ang maong mga pamaagi mapintas ug dili makatawhanon.
Bisan pa niini, giingon sa Justice Department nga gikinahanglan ang maong alternatibo aron mapatuman ang balaod.
