Nagpadayon ang tensyon sa pamilya sa mipanaw nga National Artist ug Superstar nga si Nora Aunor sa unang anibersaryo sa iyahang kamatayon niadtong Huwebes, Abril 16.
Atol sa panagtapok sa Libingan ng mga Bayani sa Taguig City, nigawas ang isyu sa giingong panagbangi tali sa iyang mga anak nga sila Ian de Leon ug Lotlot de Leon.
Sumala sa report, giingon ni Ian nga siya ang “sole legal heir” ug siya ang magdumala sa legal nga mga butang sa estate, lakip ang plano sa One Person Corporation (OPC).
Sa kampo ni Lotlot pinaagi sa iyang abogado nga si Mark Julius Estur, gikanayon nga wala’y interes si Lotlot sa bisan unsang “mana” gikan sa ilahang inahan.
Matod nila, wala siya konsultaha sa maong mga lakang ug wala usab siya’y apil sa bisan unsang fundraising o pagdumala nga gihimo ni Ian.
Giklaro usab nga wala silay nahibal-an nga Last Will and Testament nga naghatag og kontrol kang Ian, ug gibutyag nga mas pilion ni Lotlot nga likayan ang isyu aron tahuron ang handumanan sa ilahang inahan.
