Gipahayag ni Department of the Interior and Local Government (DILG) Secretary Juanito Victor Remulla nga wala pa’y gipagawas nga request ang gobyerno alang sa red notice gikan sa International Criminal Police Organization (Interpol) batok kang Harry Roque, kanhi presidential spokesperson.
Sumala pa sa kalihim, kanselado na sa pagkakaron ang pasaporte ni Roque, apan wala pa’y opisyal nga red notice nga gipagawas batok kaniya. Dugang pa niini, gipadayag ni Sec. Remulla nga nagplano na ang gobyerno nga makigtambayayong sa mga otoridad lakip na sa foreign counterparts aron matuman ang posibleng pag-aresto batok kang Roque subay sa balaod.
Lakip sa iyang pahayag, giingon sa kalihim nga bisan pa man sa ilang personal nga koneksyon ug pagkaila, kinahanglan niyang unahon ang iyang responsibilidad isip lider sa ahensya.
Sa kasamtangan, gipasiguro ni Sec. Remulla nga ang tanang lakang nga pagahimuon sa gobyerno mag-agi sa hustong proseso, ug ipatuman ang angay nga aksyon kon mahatagan na og pormal nga pag-ila ang pag-aresto batok sa kanhi opisyal.
