Gibarugan ni kanhi Department of Energy (DOE) Undersecretary nga si Atty. Jose Layug Jr. nga kinahanglan sundon ang 60-40% nga pagbahin kon adunay joint oil exploration tali sa Pilipinas ug China sa West Philippine Sea (WPS).
Matod pa sa kanhi energy official, angay nga magpabiling abri ang Pilipinas sa joint exploration sa giilugan nga kadagatan, ilabi na kay limitado gihapon ang resources sa nasud alang sa kaugalingong eksplorasyon sa mga lugar nga adunay dako nga posibilidad sa lana. Bisan paman niini, kinahanglan gihapon nga makuha sa Pilipinas ang hangtod 60% sa net revenues kon kini mahitabo.
Gipunting usab ni Atty. Layug ang sulod sa Presidential Decree 87 nga nagtugot sa mga foreign companies nga magpahigayon og oil drilling ug testing sa natural gas deposits sa nasud, basta ang maong kompanya ang mugasto sa tanang operasyon.
Gipasabot sa abogado nga kon adunay makit-an nga lana, ang tanang gasto sa oil exploration ikunhod una sa net revenue, sa dili pa ipatuman ang 60-40 nga sharing.
