Subling nagpahimangno ang Social Security System (SSS) sa mga household employers nga motamod sa balaod ug iparehistro ang ilahang mga kastabang aron masiguro nga sakop kini sa social security protection program sa gobyerno.
Ang panawagan misunod sa paglusad sa ahensya sa Kasambahay Caravan bag-ohay lamang sa 43 ka mga lugar sa Metro Manila ug Rizal.
Tumong sa inisyatiba nga mas duolon ang registration ug membership services sa mga katabang ug amo nga wala pa nga nakatala sa SSS.
Sumala ni SSS President ug Chief Executive Officer Robert Joseph de Claro, importante ang papel sa mga katabang apan kasagaran sila malimtan pag-abot sa proteksyon batok sa mga wala gilauman nga panghitabo.
Gawas sa mga nag-unang benepisyo, maka-aplikar usab ang mga rehistradong katabang sa lain-laing loan programs sa SSS ug makadawat og bulag nga proteksyon gikan sa Employees’ Compensation (EC) Program kung makasinati og work-related sickness, disability, o ngadto sa kamatayon.
Ubos sa Republic Act 11199 o Social Security Act of 2018, obligasyon sa mga amo nga iparehistro ang ilahang katabang sulod sa 30 ka adlaw gikan sa unang adlaw sa trabaho.
Gibutyag sa balaod nga alang sa mga katabanag nga makadawat og sobra P5,000 kada bulan, ikaltas ang employee’s share sa ilahang sweldo kauban ang bahin sa employer’s contribution.
Apan, alang sa mga katabang nga makadawat og P5,000 paubos, ang amo ang motubag sa tibuok kontribusyon.
Gidugang ni Social Security Commissioner Eva Arcos nga ang kontribusyon sa SSS dili angay tan-awon isip gasto, kondili usa ka pangmalungtarong pamuhunan alang sa kaayohan sa mga trabahante.
