Gipangunahan ni Pangulong Ferdinand R. Marcos Jr. ang inagurasyon sa Mahayag Dam Project niadtong Pebrero 12, nga nagtimaan sa dakong lakang sa pagpalig-on sa sektor sa agrikultura sa Mindanao ilawom sa administrasyon nga Build, Better, More o BBM program.
Nahimutang sa Barangay Lower Salug Daku, ang gi-upgrade nga dam maoy usa ka importanteng bahin sa Salug River Irrigation System o SARIS nga maoy labing dako nga irrigation system sa Zamboanga Peninsula.
Nagsuporta kini sa kapin 8,100 ka ektarya nga umahan ug nagbenepisyo sa kapin sa 3,100 ka mga mag-uuma ug ilahang mga pamilya.
Kauban usab sa maong kalihokan ang Special Assistant to the President nga si Anton Lagdameo Jr. Sec. Leo Tereso Magno, Kalihim sa Mindanao Development Authority kon MinDA, Administrator sa National Irrigation Administration kon NIA Eddie Guillen, ug mga lokal nga opisyal sa Zamboanga del Sur.
Sumala ni Secretary Magno, ang proyekto kabahin sa mas lapad nga inisyatiba nga “Building a Better Mindanao,” nga nagpalambo dili lamang sa imprastruktura kondili lakip usab ang pagkonekta sa rehiyon.
Ang Mahayag Dam usa ka hulagway sa mas dako nga panglantaw sa BBM administration, diin P9 trilyon ang gigahin alang sa 194 ka mga prayoridad nga imprastruktura nga proyekto sa tibuok nasud gikan 2023 hangtod 2028 nga nagtinguha sa mas lig-on nga ekonomiya, padayon nga pagtubo, ug patas nga paglambo alang sa tanang katawhang Pilipino.
