Gibag-o sa Senate Blue Ribbon Committee ang draft report niini kabahin sa imbestigasyon sa mga anomalosong proyekto sa pagkontrol sa baha, diin wala nay direkta nga nagrekomenda sa pagpasaka og mga kasong kriminal batok nila ni Senador Joel Villanueva, Jinggoy Estrada ug Chiz Escudero, hinuon ipadayon niini ang ilahang “preliminary investigation,” sumala ni Senate President Pro Tempore Panfilo “Ping” Lacson.
Ang draft report sa komite nga gipagawas kaniadto nagrekomenda nga sila si Escudero, Estrada, ug Villanueva mag-atubang og mga kaso sa plunder, malversation of public funds, direct bribery, ug uban pang mga kaso tungod sa mga alegasyon nga nakadawat sila og kickbacks gikan sa mga proyekto sa pagkontrol sa baha.
Si Lacson mibutyag nga ang mayorya nga mga miyembro nagsugyot nga usbon ang mga pulong nga gigamit sa report nga ipagawas.
Imbis nga gamiton ang pulong nga “charge,” giusab nila kini ngadto sa “subject to preliminary investigation.”
Gisalikway ni Lacson ang espekulasyon nga ang pagbag-o sa report may kalabutan sa napakyas nga kudeta sa Senado, nga giingong usa ka paglimbong sa minorya aron babagan ang pag-apruba sa report sa komite.
Niadtong miaging semana, gibawi usab nila ni Senador Migz Zubiri, JV Ejercito, Win Gatchalian, ug Erwin Tulfo ang ilahang mga pirma gikan sa draft report, nga nagkanayon nga kinahanglan pa kini og dugang nga pagtuon.
