Gibasura sa House Committee on Justice ang duha ka impeachment complaints batok kang Pang. Ferdinand Marcos Jr. human maaprobahan ang committee report nga nagbutyag nga kulang sa substansya (insufficient in substance) ang mga reklamo.
Sa boto nga 39-4-0, pormal nga gisalikway sa komite ang mga reklamong gisumite ni Atty. Andre de Jesus ug sa Makabayan bloc.
Sumala kang Committee Chair Rep. Gerville Luistro, gikinahanglan ang klaro ug detalyadong paglatid sa mga kamatuoran (recital of facts) aron matawag nga igo ang substansya sa usa ka impeachment complaint.
Dugang pa niya, wala nakahatag og lig-on nga ebidensya ang mga nagreklamo aron suportahan ang ilahang mga akusasyon.
Ang unang reklamo nagtutok sa giingong “betrayal of public trust” nga may kalabutan sa mga polisiya sa West Philippine Sea, samtang ang ikaduhang reklamo naghisgot sa giingong kapabaya-an sa pagdumala sa ekonomiya ug uban pang mga isyu.
Bisan paman niini, parehong giisip sa komite nga kulang sa substansya ang duha ka reklamo.
Bisan pa sa maong desisyon, gipadayag sa Makabayan bloc nga padayon nilang iduso ang paghnagyo og patubagon ang Pangulo sa nagkadaiyang hisgutanan, lakip ang foreign policy ug socio-economic issues.
Ang pagbasura sa mga impeachment complaints nagbutang kang Pang. Marcos Jr. sa mas lig-on nga posisyon sa Kamara, nga kontrolado sa iyang mga kaalyado.
