Mitugot ang International Criminal Court (ICC), sa paghatag ug espesyal nga medical accommodation kang Kanhing Pangulong Rodrigo Duterte ato sa iyang confirmation of charges hearing nga ipahigayon sa Pebrero 23, 24, 26, ug 27, 2026.
Sumala sa mando sa Pre-Trial Chamber I sa ICC, limitahan sa tulo ka oras matag adlaw ang pagdungog ug butangan kini og regular nga pahulay matag-oras aron malikayan ang sobra nga kakapoy sa lawas sa kangi Pangulo. Ang maong lakang gibase sa rekomendasyon sa mga doktor sa ICC Detention Center nga nagtan-aw sa kahimtang sa kahimsog ni Duterte.
Gipasiugda sa mga maghuhukom nga ang accommodation dili paghatag og espesyal nga pabor, kondili kabahin sa prinsipyo sa hustisya ug patas nga pagtrato sa tanang partido nga nalambigit sa kaso. Tingod niini, gihatagan og mas halawom nga panahon ang depensa alang sa ilang presentasyon.
Base sa iskedyul, adunay tulo ka oras og 30 minutos ang depensa sa paglatid sa ilang mga argumento, samtang duha ka oras ug 30 minutos lamang ang gihatag sa prosekusyon. Ang mga representante sa mga biktima gihatagan og usa ka oras ug 30 minutos. Samtang, ang mga partido gitugotan usab og tig-30 minutos alang sa opening ig closing statements.
Isabay usab sa ICC ang ilang tinuig nga pagdungog sa review sa detensyon ni Duterte sa katapusang sesyon sa Pebrero 27. Atol niini, magpresentar og oral arguments ang prosekusyon, ang mga biktima, ug ang depensa aron susihon kung angay bang ipadayon o usbon ang kahimtang sa detensyon sa kanhi Pangulo.
Bisan pa niini, gipasabot sa ICC nga mahimo pang mausab ang iskedyul depende sa dagan sa pagdungog. Posible usab nga mas sayo magsugod ang sunod nga presentasyon kon adunay partido nga makakompleto sa ilang argumento sa mas mubo nga oras.
