Planong mutanyag ang Department of the Interior and Local Government (DILG) ug P10 million reward alang sa inpormasyon nga mupadulong sa pag-aresto kang Atong Ang, nga adunay mga arrest warrant gumikan sa kaso sa pagkahanaw sa mga sabungero.
Gipahayag ni DILG Secretary Jonvic Remulla, opisyal nga gipahibalo ang reward aron mapugos si Ang nga mo-surrender.
Nagtuo ang mga awtoridad nga ani-a pa sa Pilipinas si Ang ug nakatutok ang monitoring sa Luzon.
Gihulagway ni Remulla ang negosyante nga “armed and dangerous” gumikan kuno sa pagkalambigit niini sa pagpatay sa mosobra sa 100 ka tawo ug protektado sa daghanang bodyguards.
Gipahugtan sa Philippine National Police (PNP) ang monitoring sa mga airport ug pantalan aron malikayan ang posibleng pag-eskapo ni Ang.
Samtang gipahayag usab ni Acting PNP chief Police Lieutenant General Jose Melencio Nartatez Jr., ang pinakamaayo nga lakang kang Ang ang mo-surrender.
