Gidomina sa Pinay tennis star nga si Alex Eala ang iyang dula batok sa Paris Olympics silver medalist nga si Donna Vekic sa nagpadayon nga Kooyong Classic sa Melbourne, Australia.
Ang maong torneyo usa ka exclusive, by-invite nga exhibition tournament nga gitambongan sa mga iladong tennis star sa wala pa ang nakatakdang Australian Open.
Una nang napildi ni Eala si Vekic sa bag-ong natapos nga ASB Classic sa Auckland sa iskor nga 4-6, 6-4, 6-4.
Sa labing bag-o nga dula, wala na moabot sa deciding set human sa dominanteng performance ni Eala, 6-3, 6-4. Karong tuiga, nakadaog na si Eala sa upat sa iyang lima ka singles match sa wala pa ang gipaabot nga iyang pagsalmot sa Australian Open.
Samtang, gilauman nga mosalmot sila Eala ug si Vekic sa WTA125 Philippine Women’s Open karong bulana. Bisan paman niini, wala pa matino kung magsangka ba pag-usab ang duha sa maong torneyo.
