Padayon karon ang gihimong imbistigasyon sa kapulisan kabahin sa nahitabong pagpamusil kagabii nga miresulta sa kamatayon sa usa ka babae sulod sa iyahang panimalay.
Samtang padayon karon nga ginsubay ang responsabli sa maong panghitabo.
Subay sa inisyal nga report gikan sa New Bataan Municipal Police Station giila ang biktima nga si Emilda, hamtong ang panuigon nga residente sa Brgy. Bantacan, New Bataan, Davao de Oro.
Sa inisyal nga imbistigasyon sa kapulisan, anaa lamang sa sulod sa ilahang panimalay ang biktima apan kalit kining gipusil sa wala mailhing suspetsado.
Nasayran nga ang namusil anaa lamang sa kilid nga bahin sa ilahang pinuy-anan og gituohan nga gipalusot lamang sa suspek ang buka sa armas sa bongbong sa kusina sa balay sa biktima sanglit gama lamang sa kawayan.
Gumikan sa naangkon nga samad sa biktima atol sa pagpamusil, nakabsan gilayon kini sa iyahang kinabuhi.
Sa pagkakaron, ginasuta na sa kapulisan ang motibo sa pagpamusil ngadto sa biktima.
Samtang nag-awhag usab ang kapulisan sa kung kinsa man ang naay kasayoran o adunay importanting impormasyon nga adunay kalambigitan sa krimen mamahimong mutawag sa PNP Hotline: 09093991844 o mubisita personal sa istasyon sa New Bataan MPS, Brgy Poblacion, New Bataan, DDO.
