Gilauman nga moabot og kapin 600 hangtod 1,000 ka katawhan ang mosalmot sa usa ka daku nga lihok-protesta batok kurapsyon nga pagadumalaon sa mga progresibong grupo karong adlawa, dungan sa pagsaulog sa Bonifacio Day.
Ang rally pagahimoon sa Roxas Avenue, Freedom Park, ala-1 sa hapon. Sumala sa usa sa mga myembro sa Bayan–Southern Mindanao, ilang tuyo nga ipaningil ug iparesponsable ang mga opisyal nga nalambigit sa pagpanikas ug pag-abuso sa kwarta sa katawhan.
Ilang giingon nga dili na angay hulaton pa nga molala ang kahimtang sa nasud tungod sa korapsyon nga nag-usik sa pondo nga para unta sa serbisyo publiko.
Giawhag usab sa myembro nga si Sissay ang mga Dabawenyo nga apil sa kalihokan aron ipakita nga nagbarog ang katawhan kontra kawatan sa gobyerno.
Lakip sa mosalmot ang Kilusang Mayo Uno–Southern Mindanao, Alliance of Concerned Teachers–Davao Region, Kadamay–Davao, ug AnakBayan–Southern Mindanao.
Gilauman nga mahimong malinawon apan hugot nga mensahe ang maong protesta, nga nag-awhag sa tinuod nga pagreforma ug pag-implementar sa hustong silot sa tanang nalambigit sa korapsyon sa tibuok nasud.
