Gipusil patay sa makadaghang higayon si Kapitan Oscar Dodong Bucol sa wala mailhing suspetsado sa Barangay Tres de Mayo sa Digos City, Davao del Sur pasado alas Otso kagabii samtang nagpahigayon og live streaming sa grahi-an sa iyahang panimalay.
Ang pagpamusil nakita og nadunggan pa ang sunod-sunod nga buto-buto sa armas atol sa live streaming.
Sa wala pa gipusil si Kapitan Dodong, human sa iyahang mga gibatbat nga mga isyu kabahin sumala pa sa overprice adunay usa ka edaran nga lalaki ang misulod sa iyahang balay aron itunol ang pitaka nga napunitan niini, samtang iyahang gihinabi ang usa ka lalaki, kalit lamang kining gipusil sa makadaghang higayon sa likod nga bahin.
Makita pa sa live streaming ang pagpangayo og tabang sa Kapitan nga nagkadugo na ang iyahang bukton og nagunit sa iyahang likod tungod sa mga samad pinusilan.
Human nga nagkatibulaag ang iyahang mga kaubanan niadtong tungura sulod sa balay, gilayon usab nga gitabang ang biktima nga nag-agulo pa kini og hangtod wala na kini mitingog.
Gidala gilayon ang biktima sa Digos Doctors ospital apan gideklara kini sa mga doktor nga dead on arrival.
Gilayon sab nga midagsa ang mga supporters ni Kapitan ngadto sa iyahang pinuy-anan ug sa ospital diin siya gidala human sa pagpamusil diin ilahang gikondena ang pagpatay sa Kapitan samtang gipanawagan usab ang hustisya. Sa pagkakaron, nagpadayon pa ang gihimong imbistigasyon sa kapulisan.
Samtang sa laing bahin, ang Digos City LGU nagpadangat usab og pahasubo mahitungod sa pagkamatay ni Kap. Oscar “Dodong” Bucol.
Sa ilahang pamahayag nga gipaguwa subay sa Social media ilahang gihulagway si Kap Dodong nga dili lang usa ka public servant; siya usab usa ka haligi sa kusog, tingog sa mga walay tingog, ug walay hunong nga tigpanalipod sa mga tawo sa Digos.
Ang iyang pagserbisyo gimarkahan sa pagpaubos, kaisog, ug tinuoray nga dedikasyon sa katarungan ug serbisyo publiko.
Naglakaw siya taliwala nkanila dili isip tawo sa otoridad, apan isip igsoon, higala, ug tinood nga magtutukod sa katawhan.
Nag-awhag usab ang LGU sa mga otoridad nga ipatuman ang hingpit ug patas nga imbestigasyon niini nga mabangis nga krimen.
Ang hustisya angay maangkon sumala pa dili lamang alang kang Kap Dodong, kundili alang sa matag lungsoranon nga nagtuo sa rule of law ug sa pagkabalaan sa kinabuhi.
Nasayran nga si Kapitan Dodong Bucol ang kasamtangan nga PDP Provincial Chairman sa Davao del Sur nga adlaw-adlaw nga naga-live stream ug adunay ginahisgutan nga mga isyu sa Digos City.
Pipila na usab ka semana nga nag-viral ang iyahang mga live stream tungod sa iyahang mga “expose” kabahin sumala pa sa mga kurapsyon sa ilahang lugar.
