Nisaka na ang nakabsan sa kinabuhi ngadto sa 204 kini subay opisyal nga ihap nga padayon karon nga nahipos sa mga otoridad, samtang 109 ang na-missing tungod sa dakong kadaot nga gibilin sa bagyong Tino sa Pilipinas, partikular na sa Visayas ug pipila ka bahin sa Mindanao, base sa pinakabag-ong datos gikan sa National Disaster Risk Reduction and Management Council (NDRRMC).
Sa 2024 ka natalang nakabsan, 141 niini gikan sa Cebu, 27 sa Negros Occidental, 20 sa Negros Oriental, 6 sa Agusan del Sur, 3 sa Capiz, 2 sa Southern Leyte, ug tag-usa gikan sa Antique, Iloilo, Guimaras, Bohol, ug Leyte.
Nakumpirma usab sa ahensiya nga adunay 109 pa ka tawo nga na-missing 57 niini sa Cebu, 42 sa Negros Occidental, ug 10 sa Negros Oriental. Samtang, 156 katao ang napaulat nga nasamdan o naangol tungod sa kasamok nga gidala sa bagyong Tino sa Cebu, Leyte, Negros Occidental, Surigao del Norte, ug Surigao del Sur.
Sa pagkakaron, kapin sa 820,000 ka pamilya o tugbang sa 2.9 milyong indibidwal ang apektado sa labaw 6,000 ka barangay nga nahimutang sa walo ka rehiyon sa nasud.
Base sa damage assessment nga gihimo, daghang karsada ug tulay ang naapektuhan; pipila ka lungsod ug siyudad usab ang nawad-an og kuryente ug suplay sa tubig, ug adunay mga lugar nga naputol ang komunikasyon.
Sa sektor sa agrikultura, miabot sa ₱40.7 milyon ang kantidad sa kadaot, samtang ₱17.25 milyon ang danyos nga natala sa sektor sa imprastruktura.
Inubanan niini, nakahatag na ang gobyerno og ₱198 milyon nga kantidad sa tabang alang sa mga apektadong pamilya nga naapektuhan sa bagyong Tino.
Sa pagkakaron, gikabalak-an nga padayon pa ang pagsaka sa ihap sa mga nakabsan sa kinabuhi.
