Naangol ang usa ka 7-anyos nga batang lalaki human kini nabanggaan sa usa ka bao-bao didto sa Purok Perlas, Sitio Maniksik, Barangay Sta. Cruz, Kaputian District, Island Garden City of Samal (IGACOS).
Giila sa IGACOS Police ang drayber sa bao-bao nga si Alfren Bolasa Fernandez, 39 anyos, ulitawo, residente sa Purok 4, Barangay Cogon, Talicud Island, samtang ang biktima mao si Josh Dumandan Pianar, 7 anyos, estudyante ug residente sa Purok Perlas, Barangay Sta. Cruz.
Gibasihan sa imbestigasyon nga nagpadayon sa pagbiyahe ang bao-bao gikan sa Sta. Cruz Public Cemetery, apan sa pag-abot sa dapit sa insidente, kalit nga migawas ang biktima gikan sa likod sa usa ka naka-park nga multicab ug diha na nabanggaan kini.
Gidala dayon sa drayber ang biktima sa Talicud Polyclinic alang sa inisyal nga tambal ug dayon gi-refer sa Davao del Norte Hospital, IGACOS Zone, alang sa dugang medikal nga pag-atiman.
Padayon karon ang imbestigasyon sa Kaputian Police Sub-Station aron maestablisar ang tibuok detalye sa maong insidente ug masiguro ang hustong pagtagad sa biktima.
