Nabisto mismo ni Department of Agriculture (DA) Secretary Francisco “Kiko” Tiu Laurel Jr. ang wala pa mahuman nga farm-to-market road (FMR) sa Davao Occidental, nga dapat unta natapos pa sa tuig 2021.
Sa iyang personal nga pagbisita, nakita sa kalihim nga gibiyaan ug wala natapos ang proyekto, nga maoy hinungdan sa kalisod sa mga mag-uuma sa pagdala sa ilang produkto padulong sa merkado.
Tungod niini, gilayong nakig-koordinasyon si Secretary Laurel kang DPWH Secretary Vince Dizon aron ipatubag ang mga kontraktor ug district engineers nga adunay kalambigitan sa maong proyekto.
Gipahayag ni Laurel nga dili na pasagdan ang mga proyekto nga napakyas, ilabi na kung kini nakatungod sa panginabuhian sa mga kabus nga mag-uuma.
Gipasalig usab niya nga ipatuman ang mas hugot nga monitoring ug accounting sa tanang DA infrastructure projects aron masiguro nga ang pondo sa gobyerno magamit sa tukmang paagi ug dili masayang.
