Gimando ni Philippine National Police (PNP) acting Chief, Police Lieutenant General Jose Melencio Nartatez Jr., ang Criminal Investigation and Detection Group (CIDG) nga mag-andam.
Kini tungod kay gipaabot na nga ipagawas sa korte ang warrant of arrest batok sa mga nalambigit sa kaso sa mga na-missing nga sabungero.
Ang pamahayag sa acting PNP Chief misunod human sa anunsyo sa Department of Justice (DOJ) nga nasumite na nila ang mga reklamong murder ug kidnapping with serious illegal detention batok sa pipila ka mga indibidwal nga nalambigit sa kaso.
Gipa-andam na usab ni Nartatez ang mga lokal nga kapulisan alang sa posibleng pagpahigayon sa maong pag-aresto.
Kahinumduman nga niadtong Setyembre, gipahibalo sa PNP nga nagsumite na sila og dugang ebidensya sa kasong ilang gihikay batok sa pipila ka indibidwal, lakip na ang negosyanteng si Charlie “Atong” Ang.
Gibutyag ni Nartatez nga andam silang motuman sa bisan unsang mando sa korte, ug nanawagan siya sa publiko nga magpabiling kalmado ug pasagdan nga molihok ang legal nga proseso.
