Gisugdan na sa Independent Commission for Infrastructure (ICI) ang asset recovery o ang pagpangilog balik sa mga kabtangan sa mga nalambigit aron mabalik ang kuwarta sa katawhan pinaagi sa mga civil ug administrative nga pamaagi.
Matod ni ICI Spokesperson Brian Keith Hosaka, usa sa mga lakang sa asset recovery mao ang pag-freeze o pagkuha sa kapin 2,800 ka bank accounts sa pipila ka opisyal nga nagkantidad og dul-an Php 5 bilyon, sumala sa report sa Anti-Money Laundering Council (AMLC).
Kauban niini, ipa-auction na usab sa umaabot nga mga semana ang 13 ka mahalon nga sakyanan sa magtiayong Curlee ug Sarah Discaya human madiskubrihan sa Bureau of Customs (BOC) nga kulang ang mga dokumento sa maong mga sakyanan.
Ang mga makolekta nga kita gikan sa pag-auction ang igahin alang sa gobyerno aron magamit sa ubang mga proyekto nga makatabang sa mga Pilipino.
Matod ni Hosaka, naghulat na lamang ang BOC og pag-aproba gikan sa Department of Finance sa dili pa ipatuman ang auction. Kalabotan niini, gihisgutan usab sa asset recovery meeting sa ICI uban sa pipila ka mga ahensya sa gobyerno ang paghimo og usa ka technical working group alang sa pagpangilog balik sa mga gikawat nga kuwarta aron mapalambo ang koordinasyon ug legal nga proseso sa pagbawi sa mga pondo nga nakuha gikan sa mga anomalosong proyekto.
