Gipahibalo na sa administrasyon ang pipila ka mga ngalan nga mahimong kabahin sa bag-ong gitukod nga Independent Commission for Infrastructure o ICI nga gimugna pinagi sa Executive Order No. 94 ni Presidente Ferdinand Marcos Jr.
Ang komisyon giasayn nga mosusi sa mga iregularidad, sayop nga paggamit sa pondo, ug gipasanginlang korapsyon sa mga proyekto sa gobyerno, partikular sa flood control projects sulod sa miaging napulo ka tuig.
Aduna kini gahum nga mopagawas og subpoena, magrekomenda og kaso sa DOJ, Ombudsman ug CSC, magpugong sa assets, ug mopagawas og hold departure orders kon gikinahanglan.
Apil sa mga gipahibalo nga komisyoner si kanhi DPWH Secretary Rogelio “Babes” Singson ug si Rossana Fajardo, managing partner sa SGV & Co.
Usa ka wala pa hingalanan nga chairman ang mopangulo sa lupon, samtang si Mayor Benjamin Magalong sa Baguio City magsilbing special adviser.
Gitukod ang ICI human masalbar ang P100 bilyon nga kantidad sa gituohang ghost projects sa flood control.
Sumala ni Presidente Marcos, ang komisyon tinuod gyud nga independent aron masiguro ang integridad sa imbestigasyon.
Ang ICI magsumite og regular nga report ngadto sa Malacañang hangtod sa pagtapos sa iyang mandato o kon kini buwagón sa Presidente.
