Gipahibalo sa Department of Agriculture (DA) ang ilang plano nga paglusad og usa ka Command Center karong Nobyembre. Tumong sa maong lakang ang pagpaayo ug pag-plastar sa pagdumala sa food supply chain sa tibuok nasud.
Sumala pa ni Agriculture Secretary Francisco Tiu Laurel Jr., nga ang itukod nga Command Center magsilbi isip usa ka digital nerve center. Pinaagi niini, magkahiusa ang pagtigom ug pag-analisar sa lain-laing klase sa datos nga may kalabutan sa agrikultura ug food supply.
Lakip sa mga datos nga kini mao ang impormasyon kabahin sa produksyon sa pagkaon, gidaghanon sa giangkat nga mga produkto, kasamtangang kahimtang sa stock levels, presyo sa mga palitunon, lebel sa konsumo sa mga tawo, kapasidad sa mga post-harvest facilities, coverage sa irrigation, ug bisan pa ang global market trends nga makaapekto sa sektor sa agrikultura.
Sa sinugdanan, ang unang pagatutokan sa Command Center mao ang rice value chain.
Kini tungod kay ang bugas giisip nga nag-unang staple food sa nasud, busa importante nga masiguro ang igong supply ug kontrolado ang presyo niini.
Sumala pa sa DA, nga ang mas epektibong forecasting nga mahimo pinaagi sa Command Center, kauban ang pagbalik sa regulatory powers sa DA ug National Food Authority (NFA) ubos sa mga pagbag-o sa Rice Tariffication Law, makatabang aron malikayan ang kalit nga pagsaka sa presyo sa bugas.
Dugang pa, gilauman usab nga maprotektahan niini ang kita sa mga lokal nga mag-uuma. Dili lamang sa bugas gamiton ang modelo sa Command Center.
Plano usab kini gamiton sa ubang importanteng sektor sa agrikultura, sama sa high-value crops, livestock, poultry, ug fisheries.
