Gibutyag nga supak matud pa sa balaod ang nahimong sugyot ni Senador Robin Padilla nga mandatory drug testing alang sa tanang elected ug appointed officials sa nasud, sumala pa ni PCO Usec. Claire Castro.
Matod pa ni Castro, nga kinahanglan untang gipangandaman una ni Padilla ang iyang ginaduso nga sugyot balaudnon tungod kay unconstitutional matud pa kini ug posibleng molapas sa katungod sa privacy sa mga opisyal.
Kahinumdumang, nagsumiter si Senador Robinhood Padilla og panukalang balaod nga nagmando sa tanang opisyal sa gobyerno, lakip na ang Presidente sa Pilipinas, nga mupailalom sa tinuig nga mandatory drug testing.
Ang Senate Bill No. 1200 o “Drug-Free Government Act” naglatid nga kinahanglan buhaton ang annual hair follicle drug test alang sa tanang opisyal ug empleyado sa gobyerno, gikan sa lokal nga pangagamhanan hangtod sa mga gibutang sa mga government-owned and controlled corporations.
Gihimo usab nga opsyonal alang sa mga kandidato nga magpa-random drug test sulod sa 90 ka adlaw sa wala pa ang eleksyon.
Kung adunay opisyal nga mapamatud-ang nagpositibo sa paggamit og ilegal nga droga, kini mamahimong basihan sa administratibong kaso nga makahatod sa suspensyon o pagkatangtang sa posisyon.
Nahitabo ang pagsumiter sa balaod ni Padilla human sa nahimong pagbiya ni Nadia Montenegro isip political affairs officer sa iyahang opisina.
