Daw gibatikos ni Leyte Representative Richard Gomez si Baguio City Mayor Benjamin Magalong human sa pasangil sa alkalde nga adunay mga kongresista nga kurakot.
Sa iyang social media post, wala niya ginganli ang alkalde apan klaro nga si Magalong ang gitumbok tungod kini ang dayag nga nagpasangil nga adunay mga kongresista nga nalambigit sa korupsiyon.
Gisaway ni Gomez ang mayor ug giingon nga unahon una sa alkalde ang mga problema sa Baguio City inay nga manghilabot sa lain.
Gipakita sab sa kongresista ang iyang kasuko sa balik-balik nga akusasyon ni Magalong nga iyahang gihulagway isip pamaagi aron makadani og media attention.
Gipangutana sab sa solon ang hulagway nga gipakita ni Magalong isip limpyo nga opisyal ug giingon nga sayon lamang kini gamiton nga isyu aron daoton ang Kongreso.
Gipasabot usab ni Gomez nga kung adunay personal nga away si Magalong ug ang kongresista sa iyang distrito, sila lamang ang angay mosulbad niini ug dili dapat damayon ang tanan nga mga kongresista.
Dugang pa niya nga mas angay tagdon ni Magalong ang daghang problema sa iyang siyudad sama sa nagkadeteriorar nga kalidad sa hangin, kakulang sa pampublikong transportasyon, guba nga sistema sa basura, bug-at nga dagan sa trapiko, iligal nga istruktura ug kagubot sa urban planning.
Sa iyahang pamahayag, giingon sa kongresista nga panahon na aron tarungon una ni Magalong ang suliran sa Baguio inay nga magmugna ug pasangil sa uban.
