Gisugdan sa House of Representatives ang committee hearings alang sa 2026 proposed national budget kagahapon, Agosto 18, apan nasamok kini tungod sa pagpangayo ni Navotas City Rep. Toby Tiangco nga ipakita una ang 2025 budget report sa small committee sa 19th Congress.
Gipresentar sa Development Budget Coordination Committee ang P6.793-trilyon nga National Expenditure Program ug datos bahin sa ekonomiya, inflation, ug trabaho.
Apan inay nga pangutan-on ang economic managers, gipahimangnoan ni Tiangco si Appropriations Chair Rep. Mikaela Suansing nga ipanghatag ang signed report, nga iyang giingon nga public record ug kinahanglan anaa sa archives.
Samtang, mitubag sab si Suansing nga ang report sa small committee mao na gayud ang House version sa General Appropriations Bill ug dili na kini lahi nga dokumento.
Giklaro usab niini nga wala siyay labot sa proseso sa 19th Congress kay dili pa man siya appropriations chair niadtong panahona.
Apan misupak si Tiangco ug nagbutang pa og ultimatum nga kung dili ipakita ang report sulod sa lima ka minuto, nagpasabot kini nga wala gayud ang dokumento ug posibleng gihimo lamang mismong adlaw.
Dugang pa ni Tiangco nga adunay mga distrito nga napulo ka pilo ang pagsaka sa pondo gikan sa 2025 NEP hangtod sa General Appropriations Act, hinungdan sa iyang pagpamugos nga makita ang dokumento.
Gikwestyon sab niya ang plano sa komite nga maghimo og sub-committee nga pulos lamang representatives sa partido, party-list coalition ug minority bloc, nga wala’y klarong pag-apil sa independents.
Bisan pa sa kontrobersiya, nagpadayon ang appropriation panel sa interpellations bahin sa tax collection, flood control projects, confidential funds ug unprogrammed appropriations.
