Gisuportahan sa Department of Budget and Management (DBM) ang sugyot nga i-livestream ang tanang deliberasyon sa Kongreso alang sa nasudnong budget sunod tuig.
Sa iyang mensahe sa Quezon Educator’s Research Convention nga gipahigayon sa Lucena City niadtong Sabado, Agosto 16, si Budget Secretary Amenah Pangandaman nagkanayon nga iyang gisuportahan ang paghimo sa tanang budget deliberations ingon man ang bicameral conference committee proceedings nga mas accessible sa publiko.
Siya miingon nga ang tumong mao ang pagpalig-on sa transparency ug mas aktibong partisipasyon sa matag Pilipino sa pagdumala sa nasudnong budget.
Sa iyang mensahe, gitataw ni Sec. Pangandaman nga ang sektor sa edukasyon gihapon ang adunay labing dako nga puhunan sa nasudnong budget sunod tuig.
Gipasabot sa kalihim nga ang edukasyon labaw pa sa usa ka aligned item sa nasudnong budget kondili nagsilbi hinuon nga “heartbeat” sa kaugmaon sa atong nasud.
Ubos sa proposed national budget alang sa 2026, matod sa kalihim, moabot sa P1.22-trilyones nga pundo ang igahin alang sa edukasyon, nga lapas pa gani sa target nga gitakda sa United Nations Educational, Scientific and Cultural Organization (UNESCO).
Kahinumduman nga niadtong Miyerkules, Agosto 13, opisyal nga gi-turn over sa DBM ang 2026 National Expenditure Program o ang proposed budget sa Presidente nga P6.79-trilyon ngadto sa Senado ug House of Representatives.
Mas taas kini og 7.4% sa PHP 6.326 trilyon nga national budget karong tuiga.
