Gipagawas sa Regional Trial Court (RTC) Branch 10 sa Davao City ang daghang alias warrants of arrest batok sa kanhi pulis nga si Arturo B. Lascañas kaniadtong Huwebes, Agosto 14. Ang maong mando naglakip sa lain-laing kaso nga giatubang niini, lakip ang online libel, pagpatay, ug attempted murder.
Si Lascañas, nga kaniadto usa ka senior police officer sa Davao City Police Office, nahimong kontrobersyal human sa iyang pag-angkon sa Senado nga kabahin siya sa gitawag nga “Davao Death Squad” ug mitug-an sa pag-apil sa lain-laing operasyon sa pagpatay sa miaging mga tuig. Human sa iyang pagtestigo, milarga kini sa gawas sa nasud ug gilista isip usa sa mga wanted person.
Matod sa korte, gikinahanglan nga madakop dayon si Lascañas aron motubag sa mga kasong iyang giatubang. Padayon karon ang koordinasyon sa kapulisan ug sa uban pang law enforcement agencies aron masiguro ang iyang pagdakop ug pag-atubang sa hustisya.
