Gikondena ni Senadora Risa Hontiveros ang Government Service Insurance System (GSIS) tungod sa kapin ₱1 bilyon nga investment niini sa usa ka iladong online gambling platform nga DigiPlus.
Sa iyang privilege speech sa plenaryo sa Senado, gibutyag sa senadora nga gisugal sa GSIS ang kaugmaon sa kapin 2.7 milyong miyembro, bisan pa sa klaro nga pagsupak sa gobyerno batok sa e-sabong ug uban pang matang sa online sugal.
Matod ni Hontiveros,kung ginadili sa mga empleyado sa gobyerno ang pagsugal sa casino, ngano matud pa ang GSIS daw nagsige og patad gamit ang kwarta nga gihulog matag bulan sa mga miyembro?
Gidugang usab niini nga nagpakita kini og padayon nga pattern sa kapakyasan ug mga kuwestiyonableng desisyon sa pamuhunan sa ilawom sa kasamtangang liderato sa GSIS.
Posible usab, matod niya, nga ginalapas na ang mga guidelines nga gihatag sa Kongreso aron protektahan ang pondo sa mga kawani sa gobyerno.
Dili lang DigiPlus ang nadani sa kontrobersya.
Gibutyag ni Hontiveros nga lakip sa high-risk investments sa GSIS mao ang ₱1.45 bilyon nga subscription deal sa Alternergy Holdings Corporation, nga gitugotan kuno nga walay approval sa GSIS Board ug walay endorsement gikan sa risk oversight committees.
Base sa Annual Audit Report sa Commission on Audit (COA) niadtong 2023, ₱2.38 bilyon usab ang gi-invest sa tulo ka kompaniya nga walay klarong track record sa kita o dividend payout nga supak sa GSIS Act.
Lakip pa niini, padayon gihapon ang investment sa Del Monte Pacific, nga adunay $2.3 bilyon utang ug naka-rekord og ₱19.1 milyong paper loss alang sa GSIS.
Ang kinatibuk-ang valuation loss sa tanang pamuhunan: ₱251.37 milyon salaping posible makaapekto sa actuarial solvency sa pondo sa GSIS.
Tungod niini, nanawagan si Hontiveros sa Senado nga repasohon ang GSIS Law kabahin sa mga investment rules, aron mahatagan og klarong mga guardrails o panagang ang pondo sa mga empleyado sa gobyerno.
