Adunay pagsaka sa ihap sa mga disgrasya sa kadalanan sa dakbayan sa Davao sulod sa unang pito ka bulan sa tuig 2025 kung itandi sa datos sa miaging tuig, sumala sa Traffic Enforcement Unit (TEU).
Sa usa ka pagpamulong, gibutyag ni TEU Chief Lt. Col. Christian Antonio D. Garcia nga adunay 31 posyento nga natala nga gilangkuban sa 2,598 ka mga insidente sa disgrasya sa karsada gikan Enero hangtod Hulyo ning tuiga, nga mas taas kung itandi sa 1,998 nga mga kaso niadtong 2024.
Sa tibuok datos, 4,864 ka mga sakyanan ang nalakip sa mga disgrasya, nga usa ka 25% nga pagsaka kung itandi sa miaging tuig.
Labing daghan sa mga nalakip mao ang pribadong sakyanan (37%), gisundan sa mga motorsiklo (21%), ug trucks (10%).
Sa nasampit nga mga insidente, 83% ang resulta sa kadaot sa kabtangan, 14% ang nagresulta sa minor injuries, 2% ang seryoso nga samad, ug 1% ang fatal o nakabsan sa kinabuhi.
Gipasabot ni Garcia nga 96% sa mga aksidente tungod sa human error lakip na ang paggamit sa cellphone samtang nagmaneho, kakapoy, distraction, ug pagsupak sa traffic rules.
Ang problema sa sakyanan ug deperensya sa dalan, tagsa lamang kon 2% matag-usa.
Gibutyag usab sa opisyal nga sagad sa mga lugar nga nahitabo ang disgrasya mao ang C.P. Garcia Highway ug MacArthur Highway, diin ginatrato sa ubang drayber nga daw og racetrack kung wala’y mga enforcer.
Dugang usab sa naisgutan nga kasagaran sa panahon, disiplina sa drayber ang kulang. Nasayran usab nga ang mga dalan nga labing daghan ang natala nga aksidente kon prone area mao ang Carlos P. Garcia Highway (19%), MacArthur Highway (7%), Cabantian (4%), Panacan (4%), ug Ma-a Road (4%).
Samtang kasagaran nga oras sa disgrasya mao ang tali sa alas 2 hangtod alas 4 sa hapon, samtang ang labing luwas nga mga oras mao ang tali sa alas 2 hangtod alas 6 sa kaadlawon.
Tungod niini, nagpahimangno ang opisyal sa tanang motorista nga magmatngon sa dalan, magpadayon sa pagrespeto sa traffic rules, ug magmaneho nga responsable aron malikayan ang dugang nga mga disgrasya sa siyudad.
Gihisgutan usab ni Garcia nga adunay mga lakang karon aron mapalambo ang road safety, lakip na ang pakig-alayon sa Land Transportation Office (LTO) aron matudluan ang dugang nga mga enforcer kabahin sa saktong traffic enforcement ug balaod.
