Miabot na sa 539 ka mga kabanay sa mga biktima sa giingong extrajudicial killings (EJK) ang nag-apply isip “participating victims” sa kaso batok kang kanhi Pangulong Rodrigo Duterte sa International Criminal Court (ICC).
Tumong niini nga mapadayag ang ilang panglantaw sa proseso sa pagtaral.
Sumala kang ICC Assistant to Counsel Atty. Maria Kristina Conti, dili kinahanglan nga motestigo sa korte ang mga aplikante tungod kay lahi sila sa mga testigo nga pilion sa Prosecution ug Defense.
Sakop lamang sa kaso ang mga insidente gikan Nobyembre 2011 hangtod Marso 2019. Dugang pa ni Conti, posible nga hatagan og konsiderasyon si Duterte, lakip na ang pag-apil sa pagdungog pinaagi sa video call.
Posible magsugod ang pagtaral sulod karong tuiga. Una nang gipamatud-an sa ICC ang ilahang hurisdiksyon ug gikumpirma ang mga kaso batok kang Duterte nga may kalabotan sa crimes against humanity, lakip ang murder ug attempted murder, nga giingong kabahin sa lapad ug sistematikong pag-atake batok sa mga sibilyan.
