Mibarug isip independiyente ang mga representante sa Davao bloc sa pag-abli sa ika-20 nga Kongreso kagahapong adlawa.
Apil sa mga mipili nga dili moapil sa botohan sa Speakership mao sila Rep. Paolo Duterte sa 1st District sa Davao City, Rep. Omar Duterte sa 2nd District, ug PPP Partylist Rep. Harold Duterte.
Si Rep. Isidro Ungab sa 3rd District, usa ka beteranong kongresista, mi abstain, ug sama ni Paolo Duterte, mipahayag og kalagmitang dili moapil sa majority o minority bloc sa Kamara.
Matud pa ni Ungab, ang pagpili nga mahimong independente usa ka pamaagi aron molikay sa partisanong interes ug magpadayon sa serbisyo nga patas ug prinsipyo ang giuna.
Bisan dili makaapekto sa resulta sa Speakership vote, ang ilang lihok klaro nga pahayag sa ilang kadismaya sa dagan sa liderato sa Kamara.
Kini nga mga baruganan nagpakita sa pagsugod sa mas lig-on nga grupo sa mga independente nga mamalaod sa Kongreso.
