Nakahan-ay na ang boxing ring nga gipahiluna sa sulod sa Rizal Memorial Coliseum alang sa gikatakda nga sangka nila Acting Mayor Baste Duterte ug PNP Chief. Nicolas Torre III.
Makita sa gipagawas nga mga litrato sa PNP karong hapon, han-ay na ang boxing ring ug naplastar na usab ang mga lingkuranan sa mga judges ingon man ang hagdanan padulong sa ring.
Gikatakdang ipahigayon ang maong engkwentro ugma sa buntag kon adlaw nga Domingo.
Kahinumduman nga gikumpirma sa NBI ug Bureau of Immigration nga milupad paingon sa Singapore si Duterte kagahpong adlawa.
Samtang sa iyang podcast niadtong miaging Domingo, mipadayag si Duterte nga makapildi siya ni Torre sa sinumbagay.
Kahinumduman usab nga mitubag si Gen. Torre niadtong Miyerkules pinaagi sa paghangyo og usa ka charity boxing match aron makatigom og pondo alang sa mga nabiktima sa baha.
Apan mitubag usab si Acting Mayor Baste niadtong Huwebes, nga iyang gisugyot nga motambong lamang siya sa maong charity match kung makapahimo si Torre nga suguon ni Presidente Ferdinand Marcos Jr. ang tanang napiling opisyal sa gobyerno nga ipailawom sa drug test.
Una na nga nagbansay si PNP Chief Torre pinaagi sa mga jabs, sparring sessions sulod sa PNP boxing gym sa Camp Crame, samtang nag-jogging usab ang opisyal taliwala sa ulan nga sumala pa ni Brig.Gen.Fajardo, napulo ka higayon nituyok si Torre sa Oval ground sa Camp Crame.
