Gibutyag sa City Health Office (CHO) nga nagkadaghan na ang kaso sa diabetes sa Davao City ug mas nagkabata pa gyud ang edad sa mga nadayagnos nga pasyente.
Sumala sa Non-Communicable Diseases Medical Coordinator sa CHO nga si Dr. Shri Angelo Reyes, nga adunay 30 anyos pa lang ang uban ang nahibal-an na nga adunay diabetes, nga kaniadto kasagaran makita ra sa mga 40 anyos pataas ang pangidaron.
Gipasalig ni Reyes nga kini base sa mga datos ug kasinatian sa mga kliyente sa ilang buhatan.
Lakip sa mga hinungdan mao ang hereditary genes, poor lifestyle, kakulang sa ehersisyo, ug ang sobra nga pagkaon og tam-is.
Matud pa niya, 12,000 ka indibidwal ang natala nga diabetic sa dakbayan sukad Enero hangtod Hunyo ning tuiga..
Tungod niini, giawhag ni Dr. Reyes ang publiko nga magpakonsulta dayon sa doktor ug masayod kung unsa gyud ang diabetes, aron kini mapugngan ug malikayan sa sayo pa lang nga stage.
