Tingkagol sa prisohan ang usa ka dalaga human nga nanghold-up og usa ka dryaber sa taxi kagabii.
Subay sa report gikan sa kapulisan, giila ang suspek nga si alyas “Jaysa” 19-anyos nga residente sa Sto. Nino, Brgy.Marapangi, Toril ning dakbayan sa Davao.
Samtang ang taxi driver usa ka 45-anyos nga residente sa Bucana, Brgy.76-A ning syudad.
Subay sa imbistigasyon sa kapulisan, misakay ang suspetsado gikan sa Toril terminal og nagpahatod kini sa Southern Philippines Medical Center, apan pag-abot niini sa San Gabriel St., Dumanlas, Barangay Buhangin mideklara kini og hold-up gamit ang kutsilyo nga giti-on sa hawak sa drayber.
Apan paspas usab nga nakasagang ang drayber hinungdan nga nabalda ang daotang plano niini human nga nagunita sa drayber ang kamot sa suspetsado.
Tungod niini, nangayo gilayon og pakitabang ang drayber sa mga tawo nga anaa sa palibot niadtong panahuna.
Narekober usab sa mga otoridad ang gigamit nga kutsilyo sa suspetsado.
Sa karon, gikustudiya na ang dalaga sa Buhangin PNP ug gikatakda kini nga pasakahan og kaso karong adlawa.
