Giklaro sa Korte Suprema nga ang pagtago sa tinuod nga sekswalidad, sama sa pagka-homosexual, mahimo na nga basehan sa pagpa-annul sa kasal.
Sa desisyon nga gisulat ni Associate Justice Antonio Kho Jr. sa Second Division sa Korte Suprema, giwad-an og bili ang kasal human mapamatud-an nga gitago sa bana ang iyang pagka-binabae sa iyang bana sa wala pa sila magpakasal.
Sumala sa Korte Suprema, nagsugod ang relasyon sa magtiayon sa social media, ug sa ilang unang date, nabantayan dayon sa babaye nga midistansya ang lalaki, dili gusto motapad, ug mitubag pa nga wala pa siyay kumpiyansa sa kaugalingon.
Niabot sa punto nga nahimong long-distance ang ilang relasyon human nga ang lalaki mipadulong og trabaho sa abroad, apan pag-uli niya human sa duha ka tuig, sila nagminyo.
Apan bisan kasado na, nagpabilin ang paglikay sa lalaki nga mahimong intimate sa iyang asawa, nga maoy kasagarang hinungdan sa ilang mga panagbangi.
Hangtod sa panahon nga nadiskobrehan sa asawa ang mga magasin nga adunay mga litrato sa hubo nga lalaki, nga kabahin sa koleksyon sa iyang bana.
Sa dihang iyang gikompronta, miangkon na ang lalaki sa iyang pagka-homosexual.
Tungod niini, nagpasaka og annulment ang babaye, nga gisuportahan sa Korte Suprema.
Gibutyag sa hukmanan nga ang pagsugot sa babaye sa kasal base sa bakak o panikas sa sekswalidad sa iyang kapikas usa ka matang sa pagpanglimbong, nga igo na kini nga basehan sa annulment.
Panghimatuod sa Korte Suprema, ang kasal usa ka sagrado ug legal nga panaghiusa nga kinahanglan adunay tinuod ug hayag nga pagsabot tali sa duha, ug ang pagpanglimbong kabahin sa tinuod nga pagkatawo sa usa ka kapikas mahimong hinungdan sa pagkawala sa bili niini.
